J’atteste qu’il n’y a d’Être humain
que Celui dont le cœur tremble d’amour
pour tous ses frères en humanité
(Abdellatif Laâbi) .

dimecres, 29 d’agost de 2018

VIES PARALLÈLLES

Bebèr, obrièr, ven d’aprene qu’al delà de 50 ans sèm tròp vièlhs, pas pro rentables e que val mai se téner a l’èrba. Se demanda cossí va poder cotizar pendent 42 annadas s’es fotut defòra ara. Sa femna malauteja, son filh, bac+5, fa d’interim dins un fast food ont lo mai important es … de se calar. L’estiu, Bebèr carga la veitura, atela la caravana e fa als vesins (per de rire) : « Anam passar qualques jorns sul iac, cap a Malta ». Per de bon, se’n va a Narbona-Plaja, se la veitura tomba pas en carafa, se la caravana es pas plegada pel vent, se la femna es pas operada. Quand tornarà, après qualques còps de solelh e de fissals de mosquilhs, sap que van arribar los problèmas : los preses que pujan, lo dròlle que descona per desespèr, lo vesin caumaire de longa qu’escota la television d’a fons e que crida : « Irai pas pus a Pôle Emploi ! ». A el, lo DRH li anonciarà una marrida novèla, li porgirà una entrevista a gratis amb un psicològ, li prepausarà d’estagis de formacion, un plan de reconversion e benlèu un trabalh a Dunquèrca o en Birmania. Bebèr cridarà : « La Birmania jamai ! » e acceptarà Dunquèrca. Se demandarà se, dins sa vida, s’es defendut coma cal, s’a votat coma cal per defendre de tipes coma el e sas familhas. Trobarà de non e ne farà una depression Bebèr. -------------------
 Carles-Edoard demòra a Neuilly e trobarem qualques punts de semblança amb Bebèr. Sa femna foguèt operada mantun còp : de las popas, del nas e de las patas d’aucas al ras dels uèlhs. El tanben frequenta un DRH, qu’es director d’una usina del papà. Sap çò qu’es una avaria de motor, li arribèt un còp amb son jet privat, urosament abans l’envòl. Coneis las caravanas que ne vei de còps dins lo desèrt dempuèi lo 4x4 quand fa de raids amb los ancians de Sciences Po, promocion Henry Ford. Coma Bebèr es prèst de cambiar de region s’o cal. E mai fa de projèctes d’usinas en Polonha e benlèu al Maròc. Per contra, se demanda pas jamai s’a plan fait d’aderir al MEDEF e de votar per de gents sostenguts pel MEDEF. La fortuna que li daissèt son paire tornarà a sos enfants amb un polit gasanh. Que volètz, s’o ganhèt a la susor de son front e de la d’un molon de Bebèr. Carles-Edoard deprimís pas, mercé un psicanalista de primièra borra.
--------------------
Que desirar per Carles-Edoard ? Que fòrça Bebèr : caumaires, obrièrs, estudiants, ensenhaires, quadres contunhan de creire que son totes colpables, que las leis economicas son marcadas un còp a jamai, que cal viure sarrats per fin que França demòre un país ric. Desiram-li que los qu’an quasi res protestan sens metre en causa lo sistèma, mentre que los qu’an tot, lor daissan las cruscas de las conquistas passadas.
---------------------
Que desirar per Bebèr ? La baissa del prètz de las crèmas solaras e de las locions antimosquilhs mas subretot lo rencontre amb d’esperits plan ensenhats que li portaràn la bona novela : non, Karl Marx es pas mòrt. Çò pareis que se dormís mas que se pòt desrevelhar. Sufís per aquò de menar brut : « Totes amassa, totes amassa, òc ! ».
---------------------
Segon Maxime VIVAS (Les Nouvelles 31)