De fil en veta...

Bonne nuit

2012-03-10T15:22:00.000+01:00

Journée de la femme

2012-03-08T07:10:00.000+01:00

RICARD

2012-02-26T20:31:00.000+01:00

EGO

2012-02-21T22:34:00.000+01:00

INTERNET

2012-01-09T15:33:00.000+01:00

2012

2011-12-31T18:12:00.000+01:00

Médicaments

2011-12-27T18:15:00.001+01:00

JT

2011-12-18T17:03:00.000+01:00

Vacances

2011-11-29T22:37:00.000+01:00

Grande distribution

2011-11-27T22:24:00.000+01:00

Travailler plus

2011-10-27T21:21:00.000+01:00

REGRETS

2011-10-23T21:04:00.000+01:00

ESPÒRT

2011-10-16T20:49:00.000+01:00

Arrestatz la censura

2011-10-14T20:51:00.002+01:00

Vergonha

2011-10-08T11:12:00.000+01:00

2011-10-06T13:58:00.000+01:00

GAZA ME DÒL

2011-10-04T19:59:00.000+01:00

2011-10-03T15:53:00.000+01:00

2011-10-01T12:19:00.001+01:00

De desbrembar lèu lèu

2011-09-26T18:10:00.000+01:00

USA : TROY DAVIS SERÀ EXECUTAT

2011-09-21T12:36:00.002+01:00

2011-09-20T13:59:00.000+01:00

LA CRISI DELS ASES

2011-09-07T19:27:00.005+01:00

Un òme encravatat arribèt un jorn dins un vilatge.

Trinchat sus una caissa, bramèt que voliá comprar sul pic 100 euros l’un tot l'asum del vilatge. Los païsans trobavan aquò un pauc estranh mas lo prètz èra interessant e los qu’avián fait lo pache tornavan lo pòrtamoneda plan cargat e la gauta risolièra. Tornèt l’endeman e balhava ara 150 euros, e aquí encara mantun païsan vendèt sa bèstia. Tornèt encara per prepausar 300 euros, e los qu’avián pas vendut vendèron. Coma sabiá que se ne’n demorava pas cap, faguèt dire que tornariá la setmana venenta amb un prètz a 500 euros e partiguèt del vilatge.

L’endeman, daissèt lo tropèl a l’associat e lo mandèt dins lo vilatge per prepausar las bèstias a 400 euros. A l’idèa de far un benefici de 100 euros la setmana venenta, totes tornèron comprar lor ase quatre còps mai car que l’avián vendut e per aquò far anèron manlevar a la banca.

Çò que deviá arribar arribèt, los dos òmes d’afar prenguèron de vacanças plan ganhadas, dins un paradís fiscal e totes los compraires se trapèron amb d’ases sens valor, completament endeutats, arroïnats.

De badas ensagèron de los tornar vendre per pagar los deutes. Lo cors de l’ase s’engrunèt. Las bèstias foguèron logadas pel banquièr als ancians proprietaris. Aquel banquièr anèt véser lo conse e se plorèt que, se dintrava pas dins sos comptes, anava far quincanèla el tanben e que caliá lo pagament sul pic de totes los deutes de la comuna.

Per escapar a la catastròfa, lo conse, allòc de balhar de moneda als estatjants per pagar çò que devián, la donèt al banquièr, qu’èra tanben per talastre son amic e primièr adjunt. Mas aquel, après aver requinquilhat la tresaurariá, faguèt pas res per adobar los afars dels estatjants, ni mai los de la comuna.

Coma sa notacion riscava d’èsser degalhada e coma èra escanada pels tauses d’interés, la comuna demandèt ajuda a las comunas vesinas, mas aquelas diguèron que podián pas, pr’amor avián conegudas las meteissas misérias.

Suls consèlhs senats e desinteressats del banquièr, las comunas decidiguèron de demesir las depensas : mens de moneda per las escòlas, per los programas socials, los camins, la polícia comunala … Se remandèt l’atge de partença a la retirada, se suprimiguèt pòstes d’emplegats comunals, se baissèt los salaris e tanben s’enaucèt las talhas. Disián que se podiá pas far autrament mas prometèron de moralizar aquel comèrci escandalós dels ases.

Fin finala, lo banquièr e los dos sacamands son fraires e vivon sus una isla de las Bermudas, comprada a la susor de lor trabalh. Se sonan los fraires Mercats.

Plan generoses, an promés de pagar la campanha electorala dels ancians futurs conses.

Pasmens, aquela istòria es pas acabada que sabèm pas encara çò que faguèron los estatjants.

E vosautres, de qu’auriatz fait ? De qué faretz ?

Dintrada

2011-09-06T12:51:00.001+01:00

Darrièras novèlas

2011-05-09T12:48:00.002+01:00

Mentre que Laurent Wauquiez prepausa de mesuras dignas de Le Pen, lo tribunal d'Estrasborg permet que se pòsca botar lo fuòc al Coran puèi i pissar dessús (podètz ensajar amb la Bíblia me diretz las resultas). Se me cresètz pas es aquí. De causas s'encaminan... Dormissètz plan brava gent !

Triste es lo cèl...

2011-05-08T12:54:00.000+01:00

Triste es lo cèl, çò ditz la cançon…

L’aire d’uèi tanben es fòrça triste.

Las idèas de Le Pen e companhia rajan d’a fons.

Aquelas ‘idèas’ (se se pòt dire) se trapan al nivèl de la Federacion Francesa de Fot, mas tanben dins las tribunas de Bordèu (cf la demission de Tigana).

A Montalban son d’occitanistas (aquò fa mal d’o dire) d’extrema dreta que lordejan l’espaci public.

E las televisions, las ràdios (mercés Ràdio Lengadòc) e autres mediàs que desbremban d’informar de qu’es aquel partit poirit, en mai d’aquò vòlon nos far creire qu’es un partit coma los autres (cf Robèrt Menard, la talpa fascisanta).

Pasmens bonas vacanças !

En 2010 après J-C, Dieu ditz a Noé

2011-05-02T12:41:00.001+01:00

- Un còp de mai la tèrra es venguda òrre e suspoblada, aquò’s la crisi de pertot. Te cal quilhar una arca e recampar un coble de cada bèstia e tanben d’umans, dels bons ça que la. Dins sièis meses mandi la pluèja quaranta jorns e quaranta nuèits que desrabarà tot !

Sièis meses mai tard, Dieu torna e vei sonque una debuta de construccion.

- Mas as gaireben res fait ! Deman commença de plòure !

- Desencusa-me, Sénher, ai fait çò que podiái mas los temps an cambiat :

- Ara per bastir cal un permés e l’inspector me fa patir en causa del sistèma d’alarma anti-fòc.

- Los vesins an fargada una associacion que l’empont dins la cort respectava pas las règlas de co-propietat e amagava la vista. M’a calgut trapar un mediator per adobar las causas.

- Lo servici d’urbanisme me forcèt per far un estudi de factibilitat amb redaccion d’un memòri sul còst del carreg de l’arca cap a la mar.

- Quand entamenèri de copar de fusta, la Proteccion de l’Environament trobèt que fasiái de desforestacion, que destrusiái las tutas d’espècias animalas e doncas l’autorizacion del servici de las Aigas e Forèsts èra caduc.

- Quand comencèri d’amassar d’animals, la SPA me secutèt perque los sostrasiái del mitan natural per los botar dins de gàbias tròp pichonas.

- Lo Desvolopament Durable demandèt un estudi d’impacte.

- Lo Ministèri del Trabalh me carcanhava per utilizacion d’emplegats benevòls.

- Lo servici de las Talhas me tombèt dessus, en dire que me preparavi de fugir illegalament del país, mentre que las Doanas me reprochavan una tentativa de passar la frontièra amb d’espècias protegidas o reconegudas dangierosas.

- Alara m'alassèri e daissèri lo projècte.

Sul pic, las nivols desapareguèron, un arcolan nasquèt e lo solelh se mostrèt.

- Vòls pas mai destrusir lo mond ? demandèt Noé.

- Es pas la pena, l’administracion se’n carga.

ÈRNHA

2011-04-24T13:51:00.001+01:00

Dins aquesta passa, los mediàs nos convidan de s’esbaudir sul primièr empèut de la cara, recentament realizat sus un òme dins un espital de Barcelona (Catalonha). Operacion capitada que remosèt una còla d’un trentenat de cirurgians.

En França tanben avèm d’especialistas de l’empèut de la cara. Entre eles, Micolau S. practica solet. Coma o fariá un goró, endormís sos pacients d’un biais fòrça original (un saquejal d’espatla e del còl en saumejant : « Eh bien, je vais vous l’dire. »).

Puèi, en vertadièr discípol dels metges indonesians, òbra a mans nusas, sens bistorí, aquò daissariá cicatrises.

Ça que la, lo metòd presenta dos inconvenients màgers :

- Trebola fòrça lo pichon endret del cervèl ont nisan las opinions politicas. Aquò’s atal qu’avèm vist d’operats per Micolau S. quitar sas idèas d’esquèrra per s’endralhar cap a dreta, fins a acceptar d’entrar al govèrn.

- Levats los bendatges, las caras novèlas son pas que falsas cadaulas.

(D’après Maxime VIVAS, escriveire).

Quand auretz

2011-04-10T09:05:00.001+01:00

Quand auretz acabat de far

Truquet truqueta

Sus internet

Començaretz de vos mainar

Qu’avètz quicòm d’aprestar

Lèu lèu

Quicòm qu’al polit mes de mai
Se passa

LLCER li dison

Doncas per far una revision

Dialectologica

Aquí de vivaro-alpenc

Que n’avèm pas tròp

La costuma.

La vida al campèstre

2011-04-02T13:13:00.001+01:00

MuzikinstrumentSpezial

2011-03-28T13:08:00.000+01:00

Lo brut del mond

2011-03-23T09:27:00.006+01:00

Mentre que Robèrt Menard, fondator de l’associacion Journalistes sans frontières, fa una reclama desvergonhada del FN sus RTL, la Despacha del Miègjorn se pausa qualques questions sus la guèrra en Libia.
En Itàlia, La Repubblica nos assabenta sul biais pels revolucionaris de defugir la censura en Africa del Nòrd.
El Mundo (Espanha) s’interessa al jutjament comol de cleméncia d’un dels darrièrs criminals nazis en Alemanha.
Le Monde tòrna sus la situacion en Libia e sus las dissensions al dintre de la coalicion anti-Kadhafi.
Al Portugal, lo Correio da manhã nos parla d’una jornada de commemoracion mondiala del teatre.
Lo jornal algerian El Watan fa un reportatge sul festenal cinematografic amazigh d’Azeffoun ont se tracta tanben del cinemà còrse.
Encara de cinemà amb Ma part du gâteau de Cédric Klapisch sus l'Humanité.
L’operacion francesa ‘un batèu per Gaza’ es un article del periodic La Croix.
Totjorn de cinemà amb la sortida del film ‘Al cabaret d’en fàcia’ en lenga regionala dont l’occitan e jostitolat en francés dins Midi Libre.
Enfin, l’umorista Pierre Dac es lo subjècte d’una emission interessanta de France Culture.
Per clavar, Catalonha sembla aver de problèmas amb las successions (dessenh tirat d'Avui).

Una polideta que marceja

2011-03-21T08:49:00.000+01:00

Quand avèm pas l'astre de poder anar dins la garriga (; o dins los paluns ;) per passejar, nos contentam dels nòstres bòsques ont podèm remirar la tulipeta (Fritillaria meleagris).

Qual vòl ganhar de milions ?

2011-03-18T13:30:00.001+01:00

Aquesta nuèit faguèri una cachavièlha.
Aviái parcada la veitura ont caliá pas e m’èri empegat un verbal. Aqueste matin, al despertar, quina jòia, quin plaser, quin contentament de veire que los 45 euròs me los aviái estalviats !
Mas ara, soscatz un momenton : amb un pauc d’entrainament se pòt far un sòmi cada nuèit. Chifratz : 45 euròs per 30 nuèits aquò fa 1350 euròs per mes, sens cap de fatiga (e defiscalizats per subrepés) !
Alara ? Avètz trapat quicòm mai, vosautres … per ganhar de moneda en bolegar pas ?
Encara, benlèu poiretz calcular per aumentar la saqueta. Per exemple, los verbals per despassament de velocitat son mai valorizats. Poiretz somiar tanben qu’avètz desbrembat de pagar, aquò fa una majoracion.
Se volètz doblar lo gasanh podètz far prangièra.
Vesètz qu’es pas una idèa de carton…

Quin malur !

2011-03-13T17:03:00.000+01:00

A la pichona fornariá del pichoneton vilatjòt ont passavi mas vacançòtas, doas pichonetas mametonas se rescontran.
- Òu, cossí va la Margarida ?
- Oi, pauròta, aquò va pas brica…
- Mas de qué se passa ?
- E ben pecaire…
E plora que ploraràs.
- E ben, diga-me…
- M’es mòrt l’òme !
- Ò mon Dieu, chès quin malur, quin malur ! E cossí aquò’s possible ?
- Sas, lo mandèri per l’òrt per fin d’amassar qualques carròtas e de pòrres, de que far la sopa. Es tombat d’un malaise. Quand los pompièrs son arribats, aviá virat l’escabèl …
- E alara, alara … que faguères ?
- De pastas, i, i, i… !

Aquò’s meravelhós

2011-03-13T09:12:00.001+01:00

Aquò’s meravelhós la vielhesa, quin pecat que s’acabèsse tan marridament (F. Mauriac).

PALHASSA

2011-03-04T14:31:00.001+01:00

Totjorn sul tèma del circ aquí una video del circ del solelh (o regretaretz pas).

Lo 8 de març

2011-03-03T22:23:00.001+01:00

Me diretz : « Per de qué far una jornada pels drets de las femnas ? Alara qu’aquò’s cada jorn que los cal defendre ? »
D’en primièr un empacha pas l’autre.
E tanben es pas un quicòm qu’es casut del cèl coma aquò.
L’istòria nos fa conéisser qu’en 1910, una militanta alemanda Clara Zetkin prepausèt a la Conferéncia Internacionala de las femnas socialistas que se debanava a Copenaga, d’organizar cada annada « una jornada universala, femenina de luta pels drets de la femna e per la patz. »
Auèi lo sindicat CGT fa sa crida : « Aprofèitem aquela data per far avançar las reivendicacions de las femnas al nivèl mondial, europenc, francés e dins nòstras entrepresas. »
www.cgt.fr/L-egalite-un-combat-de-tous-les-jours.html
Per una vertadièra egalitat femnas-òmes.

A tote(a)s lo(a)s resistent(a)s

2011-02-27T11:47:00.003+01:00

Aquí lo poèma bèl de R. PECOUT "En remembre de Maria Durand e de las embarradas de la Torre de Constància."

Medalha de la torre de Constància a Aigas-Mòrtas en sovenir de Maria Durand pel pintor Pau Sarrut.

Imatge trobat sus Wikipedia.

A l'ombra blava del figuièr.

2011-02-26T20:56:00.000+01:00

Resistissi pas de vos balhar una revirada d'aquela tan polida cançon de Jean Ferrat.

La Cigala e la Formiga

2011-02-25T10:22:00.001+01:00

Un còp èra una formiga e una cigala, fòrça plan amigadadas. Tota la davalada, la formigueta trabalhèt sens repaus, trabalha que trabalharàs, amassant noiridura per l’ivèrn. Aprofeitèt pas brica del solelh, del ventolet suau, nimai de las parladissas entre amigas lo ser, en tastar una bona cervesa plan fresca.

D’aquel temps, la cigala fasiá la vida amb sas companhas dins los bars de la vila, cantant, dançant, se solelhant, prenent plaser sens se mainar de la marrida sason que mancariá pas d’arribar !
Puèi, quand venguèt la fred, la formigueta alassada pel trabalh s’embarrèt dins son ostalet comol de resèrvas fins al fustam.

Tot bèl just la pòrta clavada, vaquí que qualqu’un la crida del defòra. Aquò’s son amiga la cigala dins un veïcul d’espòrt flame nòu amb un mantèl mai que mai luxuós que i fa :
- Adieu, polideta ! Me’n vau passar l’ivèrn a París, me podràs susvelhar l’ostal ?

La formigueta respond :
- Plan segur, mas de que t’es arribada ? Ont as trapada la moneda per crompar aquèla veitura e aquel mantèl ?
La cigala :
- Figura-te que cantavi dins un bar la setmana passada e a un productor li agradèt la mía votz. Signèri un contracte per d’espectacles a Paris. A prepaus, as besonh d’un quicomet d’amondaut ?
- Òc, respondèt la formigueta, vegèsses lo sénher La Fontaine de còps que i a, que se’n ane cagar a la vinha !

MEDECINA

2011-02-24T21:54:00.000+01:00

Que ma jòia demòre...

2011-02-24T12:27:00.000+01:00

Lo jornalista : « Avèm ausit lo discors intransigent del president … »
A qual pensariatz vosautres ?
E ben vos sètz plan enganats, s’agís de Kadhafi !
Mas diferéncia : en çò nòstre los tancs son dins las clòscas… (e a la television).
E aquí (ça que la, aquò a pas res de veire…) la democracia del cada jorn en França.

Sens comentari.
Bona jornada.

CALPASDESCONAR

2011-02-19T14:45:00.000+01:00

Novèlas del mond

2011-02-18T14:16:00.002+01:00

Lo mond arab fa totjorn rajar la tencha dels jornals : lo Monde Diplomatique e lo Télégramme.

La Cort dels comptes tanben fa parlar amb entre autras causas la question de la vaccinacion (Le Point).

En Belgica s’interessan a la caça de las balenas al Japon.

En Espanha, El País nos assabenta sus la formacion dels sistèmas planetaris amb una polida fòto.

Bolivia vòl estalviar un element fòrça important : l’aiga.

A Moigny-sur-l’Ecole, la comuna publica los panèls d’immatriculacion dels nomadas. Visca la democracia !

Dins Marianne se fa una soscadissa sus la diplomacia francesa, mentre que lo Figaro tòrna sul Rubygate…

Las Palmas Academicas ven un subjècte dels cauds (Libération).

Sèm contents per elas : las bancas son pas mai malautas (l’Humanité).

L’Express conta la condemnacion del grop Carrefour que paga sos emplegats al dejos del SMIC !

Un pauc d'umor amb lo dessenh del jornal italian Il Manifesto que vos aconselha d'aver fisança als caps que menan lo mond.

Per 2012 o sabètz, o vos an plan dit (radios, TV, jornals, etc) es pas la pena d’i anar, aquò’s fait : DSK davant Sarko. La borgesia a causit per nosautres. Comprendretz per de que L. Parisot, patrona del MEDEF es tanben vice-presidenta d’IFOP.

Per acabar, una informacion balhada per La Dépêche du Midi : 15% dels ascensors de Tolosa son fòra lei.

Mas de que fa lo Monta-mametas ? :)

LE QUATTRO VOLTE

2011-02-04T15:46:00.000+01:00

Avèm en nosautres quatre vidas que s’entrevescan las unas las autras. L’òme es un mineral que son esqueleta es de mineral ; l’òme es tanben vegetal que sa sang es coma la saba de las plantas ; es un animal per çò qu’es movadís e possedís una coneissença del mond del defòra. Enfin l’òme es uman que ten volontat e rason. Nos devèm conéisser quatre còps.

Pensada atribuida a Pytagore e qu’auriá inspirat Michelangelo Frammartino per son film remirable LE QUATTRO VOLTE (veire una analisi prigonda sul siti Mescladís e còps de gula).

Regim

2011-02-02T21:17:00.000+01:00

Aquò me fa lagui.

I aviá tròp de temps qu’èri plan planet, sens cap de problemas, sens l’ombra d’un guirguilh.

E vaquí que te veni de véser que preniái de pes, bravament de pes. Benlèu per lutar contra la dent canina del fred ? O benlèu autra causa... Seguissi mon enquèsta.

Per me dochar, aviái pres la marrida tissa d’emplegar las rèstas de shampong.

Vaquí que uèi t’agachi la notícia, e de qué te vesi ? Aquò : « Per mai de volum e d’abondància ».

Me damne, colhon de la luna !

Alara, me demòra pas que dos remèdis : la sopa de caulet en pilulas que ne parla Jòrdi d’Olmières sus son siti o alara una autra solucion, la de me netejar amb lo liquid de la vaissèla qu’es marcat dessús : « Destrusís quitament lo grais mai caput ».

Primièras flors de l'annada

2011-02-02T20:45:00.000+01:00

Lo gos cinefil

2011-01-22T18:31:00.002+01:00

Revista de premsa

2011-01-17T12:25:00.006+01:00

DSK, lo paure d’el qu’a perdut una escasença de se calar.

Vergonha per Duvallier que se’n tòrna en Haití : aquí.

La granda distribucion « a l’onor » amb un licenciat per 5 euròs que se suicida en Itàlia.

Mentre que Berlusconi es encara empegat dins sos afars de cuòl e Le Pen dins son racisme costumièr.

Es marrida la moneda ? Se’n apren de polidas sus Yahoo.

L’Express : Polanski, pantèra d’onor de la 16èna ceremonia de las Lumières.

Es totjorn mai grand : avètz aquí un reportatge emocionant d’El Pais sus Garcia Lorca.

Mai de 600 mòrts en Brasil, un article del jornal portugués Sol.

Lo Mediator fa totjorn parlar d’el dins Le Point.

Lo Monde Diplomatique s’interessa a Argéria.

La Dépêche du Midi nos parla del tramvai de Tolosa.

Problema amb lo CAPES de catalan (l’Indépendant).

Sud-Ouest festeja la trufa al país de La Boétie.

E totjorn la situacion en Tunisia, dins Libération.

Albricòt del Japon

2011-01-16T12:20:00.001+01:00

Lo caqui o albricòt del Japon (Diospyros kaki L) : polit e gostós !

Musica sioplèt !

2011-01-12T17:50:00.001+01:00

Pels travèrses...

2011-01-11T20:44:00.001+01:00

JÒC en 15 questions

2011-01-02T17:22:00.002+01:00

Volètz jogar ? Segon vòstre vejaire son vertadièras o pas las proposicions seguentas :

1. Lo director general del grop LVMH se ganha 18 milions d’euròs en una jornada.

2. Lo GPL foguèt descobèrt en 1910 per un engenhaire american.

3. Andrieu Brink es un escriveire australian.

4. L’estatueta de la Venús de Lespuga compta 21000 ans.

5. La « cacassa del cuol nus » es una recèpta d’Ardècha.

6. Dins sas memòrias, Bush regreta aver balhat d’òrdres per la tortura.

7. Mario Vargas Llosa prèmi Nobèl de literatura 2010.

8. Lo SMIC orari francés a 10 euròs lo 01/01/2011.

9. Lo president regional del MEDEF de Champanha-Ardenas vòl cambiar lo nom de la region.

10. Barak Obama gràcia Mumia Abu-Jamal.

11. « Cap en bosiga » es un film de Jean Becker.

12. Gourcuff elegit primièr esportiu francés en 2010.

13. Israèl reconeis oficialament l’Estat Palestinian.

14. Los sòcis de DSK tròban lo projècte del PS tròp a esquèrra.

15. France Inter reïntegra Didier Porte, Stéphane Guillon, Gérald Dahan, Didier Adès, Dominique Dambert, recentament licenciats.

(Solucions dins los comentaris).

BONA ANNADA 2011

2010-12-31T15:10:00.000+01:00

La sason del gratacuol

2010-12-28T20:37:00.002+01:00

Lo gratacuol (o garraba) es la fruta del garrabièr.

S’emplegava autres còps per far de farsejadas, mas se pòt utilizar per far de confituras gostosas. Lo problèma es qu’aquò o se cal ganhar !

D’en primièr se cal acarar amb lo vegetal espinut (amistós coma un garrabièr !), val mai se cargar de pelhas vièlhas e se cambiar en singlar. Cal tanben s’armar de paciéncia : auretz vòstre kilò benlèu al cap d’una ora… Un conselh : i cal pas anar amb la saqueta en plastòc del supermercat que se desboselarà sul pic d’un còp d’espina e auretz lo trabalh escampilhat pel sòl !

Per la seguida, es un trabalh fastigós que balha a pro pena 1,5 kg de confitura per 4 kg de fruta.

Vaquí la recèpta de gratacuol (o garraba).

Lavar las garrabas dins d’aiga, levar las branquetas, las fuèlhas, etc.

Dins un pairòl, cobrir d’aiga e far bolhir 30 min.

Daissar enfregir. Quand es tebés, passar a la molineta, grasilha mejana.

Pesar e ajustar 1/3 del pes de sucre.
Tornar far prene lo bolh.

Botar en topin.

Ieu ajusti un pecic de polsa de caróbia per espessir e perfumar.

Lo gratacuol es comol de bonas causas per la santat.

Composicion :

- pectina ;

- sucres (dont lo sorbitòl) ;

- polifenòls (tanins) : pròanocianidòls e flavonoïdas ;

- vitaminas : vitamina C (acid ascorbic) 0,5 à 1,7 % , vitaminas del grop B ;

- autres acids organics : citrica, malica.

Ara, nos podèm congostar !

Noveleta de Nadal

2010-12-27T09:48:00.000+01:00

Es lo temps de Nadal, e i a un fum de mond uèi dins lo metrò.

Subte, un tindament ressona. Sul pic, un òme se debigossa bravament. S’afana mai que mai. Tortilha que tortilharàs. Ensaja de s’enfonilhar la man dins la pòcha. Es malaisit qu’es pas de creire amb tot aquel mond quichats coma de sardas. Es pas de bon far qu’es sietat. Totjorn la musica, quina pega ! Quita pas de bolegar fèrme.

Ara s’es quilhat. Capitarà o pas ? Enfin, la man es dins la pòcha. Furga, fosega furiosament. E tot d’una, fin finala , sortís lo mocador. Raspa ! D’un gèst rabent mas biaissut, lo mocador trapa, còp sec ça que la, la gotassa que nasejava dangierosament e menaçava de s’escapar del cap d’un nas grandàs, roginós e lusent per s’escampar qual sap ont ?

La sonariá ?

Es lo despertador que campaneja, es ora de se levar !

E cric e crac lo sòmi es acabat.

Present : lo camin de Damas

2010-12-23T10:04:00.001+01:00

Per Nadal vos vòli far un pichon present qu’aquela pauseta n’es un. Per ieu, una vertadièra revelacion… e cossí dire ? la confirmacion que :

- Lo sud es quicòm qu’existís, quicòm de fòrt (culturalament).

- La mar miègterranèa es pas qu’un lac coma o disiá Josèp Delteil.

- Avèm fòrça de veire amb lo mond oriental (mercès A. Surre Garcia per sas conferéncias : Los Orients d’Occitània).

- Una cançon, coma un aucèl migrator…

- La cultura universala o pas.

- La cultura umanista o pas.

- La libertat coma una cançon.

- Una flor que seguís son camin, la Nigèla Damasquina de J-C. Forêt (Sang e saba) ?

- Una filha que cresiam perduda e que tòrna encara mai polida.

Es aquí lo miracle : una version libanesa de Adieu paure Carnaval ! Wa Habibi per Savina Yannatou, cantaira grèga e sos amics Ayoub Bout e Miquèl Gil Primavera, sièis minutas d’emocion blosa aquí :

Bon Nadal a totes !

França Musica

2010-12-19T11:17:00.005+01:00

Diluns 13 de decembre, Richard Galliano èra convidat sus França Musica per Alex Taylor dins l’encastre de l’emission « Musique matin». Es un musicaire (acordeonista) que s’interessa dempuèi totjorn al jazz mas tanben a totas las musicas popularas. Tornava bèl just d’America del Sud, particularament de Brasil ont aviá vistalhat lo Nordeste. N’èra encantat e parlèt amb fòrça emocion del fòrro. Evoquèt tanben son trabalh amb d’artistas coma Nougaro, Barbara, Gréco. Parlèt de Bach e de la musica classica. Viu a Niça e jòga de còps encara amb son paire qu’a ochanta ans passats. Una personalitat atrasenta.
Aquí un escapolon de son talent.

Dimècres 15 de decembre, èra Hervé Di Rosa lo convidat d’Alex Taylor sus França Musica dins l’encastre de l’emission « Musique matin ». Òc, fau bravament de reclama per aquela emission que la tròbi fòrça interessanta. Non, ai pas d’accions a França Musica. Hervé Di Rosa es un artista pintre co-fondator, amb son fraire, del Musèu Internacional de las Arts Modèstas de Seta (MIAM). A l’ora d’ara, viu a Sevilha ont se debana (fins al 30 de decembre 2010) la mòstra que se sona : « Demasiado viejos para el graffiti, demasiados jóvenes para morir ».
Ne vaquí una idèa.

De qué, romegaires ?

2010-12-17T14:14:00.001+01:00

Son romegaires los Occitans ? Benlèu qu’aquò’s vertat ? Subretot s’agacham lo vocabulari que ne parla.

E encara, n’ai segurament desbrembat…

S’acometre

S’encanhar

S’encavalar

S’encanissar

S’encolerar

S’engalinar, s’engalinejar

S’emmoscalhar

Se cabrar

S’enfadar

S’enfuocar

S’encolerir

S’enchiprar

S’enferonir

S’emmaliciar

S’endemoniar

S’endiablar

S’enartar

S’encapriçar, s’encapriciar, se capriçar

S’empebrinar

S’empepinar

S’encatarriar

S’enfuronar

S’enfuscar,

S’enfumar, s’enfumascar

S’engarçar

S’engastar

S’engarrir

S’engimerrar, s’engimerrir

S’enlanhar

S’irritar

S’irar

S’enneïr

S’enrufar

S’emportar

Se montar

S’iragar

S’iràisser

S’enguindar

S’engendarmar

S’endenhar

S’enrabiar

S’entaïnar, s’encaïnar

S’entantinar

S’enverenar, s’enverinar

Se corroçar

S’endevar

S’eneguetir

S’embalar

S’embufar, s’embufecar

S’amalir

S’embroncar

Aver la fotra

Montar sus la figuièra

Plan segur, dempuèi 8 sègles, avèm de que…

2010-12-12T20:46:00.000+01:00

Revista, revista, revista...

2010-12-05T21:29:00.003+01:00

E ben, quina tropelada de blògs LLCER !

Una amorosa de Pei-Lobié amb una decoracion polideta, Occima que nos parla de la bona vila d’Arles, Carole de la pedagogia Freinet, una parpalholejaira audenca nostalgica de las annadas 70 (n'en cal ça que la !), un poeta de las garrigas roquetianas, una cercaira de tresaur en Avairon, una sòcia de rubí de XIII, una Sanquilha afiscada de BD (entre autre), lo blòg de Mimi del còr bèl, una lemosina qu’estima plan son país (normal), una Caròleuh dançaira de tria, un despatriat en Germania, un Marselhés totjorn jove, Tomàs l'afogat de musica, un Pichirico de las fotòs remirablas, un amorós de Bèla Ciao, un passejaire sul camin d’Augièr.

En mai d'aquò, los qu’an pas esperat la crida de Mela : un Lemosin mai rapid que son ombra (urosament qu'i siás !), una Fadarèla e son blòg gaireben professional, lo polit Cant de l’ochava, un rabelesian pro savi, l’Anchoia, Chichoa en barraquetas.

Coma tot escapolon que se respècta es fòrça mirgalhat, manca pas que lo ratet-lavaire :)

Teatre de La Rampa.

2010-11-29T20:37:00.005+01:00

E mai patissiái encara d’una lombalgia, capitèri aqueste dimenge de vèspre de grisalha de me trigossar duscas al vilatge vesin ont se jogava LA PEÇA que cal veire sens mancar : Aristofanadas, femnas al poder, revi -rat directament del grèc per Marcèu Esquieu e jogat d’un biais remirable per la companhía TIO La Rampa bailejada per Bruno Cécillon.

http://www.larampe-tio.org/aristofanada-oc.php#

Un vertadièr chal blos. I cal anar ! Un centenat de personas an presada aquela produccion, sens pas tròp de reclama del costat de la comuna qu’èra un espectacle pagat pel Conselh General. Òsca al Conselh General de Garona Nauta. Una meravilha fòrça plan adaptada e modernizada. Tan modernizada qu’ai cregut reconéisser un morre plan conegut.

Per vos ajudar a devinhar aquela cabòça, es pas cada jorn qu’avèm l’escasença d’èsser irrespectuós (desencusatz me pòdi pas reténer), e ben aquí l’avètz.

Tot va plan (revista de premsa)

2010-11-26T14:42:00.007+01:00

"Europencs jos tutèla", títol del jornal L’Humanité del 30 d’octobre. Lo Tractat de Lisbona qu’èra reputat se poder pas cambiar es modificat per perenisar lo Fons d’Estabilitat Financièra e lo botar jos l’autoritat del FMI. Los govèrns poiràn atal balhar tornarmai de moneda publica a las bancas.
Lo 13 de novembre, L’Alsace declara : "L’icòna de la democracia birmana Aung San Kyi es liura". Après mai de sèt annadas de residéncia susvelhada, la laureata del Prèmi Nobel de la patz es considerada per d’unes coma sola alternativa a la junta al poder.

      "Las enquistas sus l’afar Woerth-Bettencourt, desplaçadas de Nantèrra a Bordèu" anóncia Le Parisien lo 17 de novembre. Los motius evocats son la preservacion de la seguretat publica e la bona administracion de la justícia.
      Le Monde del 19 de novembre nos assabenta : "Mesa en demòra pel CSA après los prepaus sus los « negres » de J-P. Guerlain". Lo pro conegut perfumaire aviá declarat, sus la cadena France 2 : « Sabi pas si los negres an totjorn talament trabalhat… Mas enfin… ».
       "Los fraisses medicals provocarián una pauretat de las grandas pel mond" es un títol del jornal Le Point del 22 de novembre que fa referéncia a un rapòrt de l’OMS : serián 100 milions de personas d’èsser tocadas cada annada.
      Lo 23 de novembre, en aussissent FR3, aprenèm que los manifestants contra la reforma de las retiradas èran 10 000 a Tolosa. Lo jornalista cugèt bon d’ajustar qu’èran, al mai gròs del movement, unes 250 000. Es pas çò que disián a l’epòca… Mas enfin… coma diriá Guerlain.
      Lo 25 de novembre, Le Nouvel Observateur, relevant una chifra del Collectiu Les Morts de la Rue, escriu que "276 SDF son mòrts en França dempuèi la debuta de 2010". L’association ne rend responsables la solitud, lo sentiment d’èsser inutil e una set pas reconeguda de dignitat. Se poiriá ajustar qu’ara lo fred va pas adobar las causas…

Lo 26 de novembre L’Express desvela : "Karachi : Sarkosy en primièra linha". E mai lo cap d’estat regetèsse tota responsabilitat, lo sieu nom apareis dins lo dorsièr.

E en Occitània me diretz ?
E ben en Occitània, "manifestaràn per la lei", çò ditz La Setmana del 25 de novembre. "Lo Collectiu « Anem òc » prevei una manifestacion granda en 2012 per reclamar la venguda d’una lei de proteccion de las lengas minorizadas de França". Òsca !

Lo temps passa tròp viste...

2010-11-25T13:51:00.004+01:00

Soi un pauc tardièr per ne parlar mas me desencusaretz ?.
Lo 11 de novembre èra l’occasion de festejar la patz e de parlar d’un quicòm que s’ausís pas tròp, vòli dire los monuments als mòrts pacifics. N’i a mai que cresèm. Van de l’evocacion de la patz pel biais de l’expression de las òbras a una forma mai dirècta qu’es l’inscripcion. Veirem pas que la segonda.
L’expression mai espandida clama : « Maudite soit la guerre ». Se trapa a Gentioux (23), Balnot-sur-Laignes (10), St Martin d’Estreaux (42), Equeurdreville-Hainneville (50), Cazaril-Laspenes (31).
A St Martin d’Estreaux, a « Maudite soit la guerre » es ajustat : « … et ses auteurs, les innocents au poteau d’éxécution ». Trobam un autre panèl en latin : « Si vis pacem, para pacem » ( Se vòls la patz, apresta la patz).
   A Clans (06) la condemnacion es mai precisa : « Maudits soient les responsables de la guerre et honneur à ceux qui ont travaillé pour la paix ».
Avèm tanben : « Guerre à la guerre » a Ste Savine (10), Les Noës-près-Troyes (10), Gy-L’Évêque (89) ont es ajustat : « Paix entre tous les peuples », a Chevillon (89) amb tanben « Fraternité entre tous les peuples ».
D’unes rampèlan un comandament de la bíblia : « Tu ne tueras point » a Avion (62) e Peille (06).
   A Rocles (03) se conselha : « Apprenons à supprimer la guerre ».
   A Dardilly (69) es marcat : « Contre la guerre, à ses victimes, à la fraternité des peuples, que l’avenir console la douleur ».
   A Lezoux (63) trobam : « Aux enfants de Lezoux, victimes de la guerre, à ceux qui ont combattu pour l’abolir ».
Podèm trapar tanben de citacions coma a St Appolinaire (69) : « La guerre est le massacre de gens qui ne se connaissent pas au profit de gens qui eux se connaissent mais ne se massacrent pas » (P. Valéry).

O encara a Mazaugues (83) : « L’union des travailleurs fera la paix du monde ». (A. France). E totjorn a Mazargues : « L’humanité est maudite si, pour faire preuve de courage, elle est condamné à tuer éternellement ». (J. Jaurès). Totjorn a Mazaugues, lo conselh de la comuna elegit en 1935 faguèt marcar :
« A bas toutes les guerres ! Vive la république des travailleurs ».
A Château-Arnoux (04) es lo títol dun poema qu’es gravat : « Pax, vox, populi ». (V. Maurel, ancian conse).
A Riom (63), los fusilhats per l’exemple son pas desbrembats : « L’ARAC aux victimes innocentes des conseils de guerre 1914-1918 et à celles de la milice et de la Gestapo 1939-1945 ». Ni tanpauc a Royère-de-Vassivière (23) ont trobam sus una tomba : « Maudits soient les bourreaux. Baudry n’est pas un lâche mais un martyr ».
Enfin avèm tanben d’inscripcions en lenga nòstra a Aniane (34) : « La guèrra qu’an volgut es la guèrra a la guèrra, son mòrts per nòstra tèrra e per tota la tèrra » e a Lavercantière (46) ont se tròba la mencion « Paures dròlles ».

E tu, mon vilatge...

2010-11-21T19:32:00.000+01:00

Tota semblança amb una situacion reala es pas una vista de l’esperit. Se pòt verificar aquí :

Gardarem La Menude http://www.gardaremlamenude.com/

FR3 http://sud.france3.fr/info/midi-pyrenees/une-pyramide-de-dechet-contre-un-centre-commercial-65957802.html?onglet=videos

Television

2010-11-21T10:23:00.004+01:00

Agachavi la television, lo gat se dormissiá, la menina tanben, tot anava plan planet. De que i aviá a la television ? E ben una partida de rubí te ! De 15 per èsser mai precís. L’equipa de França, amb sa còla de jogaires occitans, s’acarava a la d’Argentina, granda nacion de rubí (e tanben de fotbòl). A un moment, los franceses fan una dèca, l’òme en negre, qu’aviá cargat un vestit roge per l’ocasion, fiula, una escasença de marcar 3 punts pels argentins. Lo tiraire tira, mas la vessiga passa a costat. Alara vesèm lo jogaire macat que se vira cap als colegas per se desencusar, e legissèm suls pòts lo mot prononciat : « Sorry ».

Òc avètz plan legit. Valent a dire qu’un jogaire que sa lenga mairala n'es l’espanhòl, s’exprimís en anglés…

Aquò me rapèla un libre qu’ai legit i a pauc de temps ont i se tracta de los films italians destinats al doblatge : dison pas mai « Buon giorno » qu’es tròp long mas puslèu « Salve », expression vielhanchona e abandonada de longa mas qu’es mai pròche de « bye »….

Soi piòt o alara i a de lengas mai nòblas que d’autras ?

Arqueologia

2010-11-17T10:22:00.000+01:00

Epilòg.

Foguèt sonque un pauc mai tard que Dieu inventèt lo pastagàs per fin que los Marselheses venguèsson pas los mèstres del mond.

Actualitats

2010-11-08T14:42:00.006+01:00

Lo dissabte 6 de novembre dins França tota se debanèt una novèla jornada de mobilizacion contra lo projècte de reforma de las retiradas. Los manifestants èran tres còps mens nombroses que los autres còps e se pausa ara la question de l’aflaquiment e del fracàs definitiu d’aquela protèsta. Tanplan, lo secretari de la CGT a de problèmas amb sa basa. Los sindicats se devon acampar tornamai per soscar cossí acabar lo movement de cauma.

Jornal presentat pels non grevistas.

Quand ausissi aquò, me demandi s’aquel mond (los jornalistas non grevistas) se bolegan dins la realitat vertadièra… Pas un mot sus l’avenidor d’un govèrn que recampa 75% de personas contra el, qu’accepta pas cap de dialòg, que ten los mediàs dins sa man (veire los licenciaments dels umoristas de France Inter). Me sembla qu’es un quicòm d’istoric e quitament d’unic dins l’istòria del país nòstre. Emai quand son pas de jornalistas non grevistas, es totjorn la votz del mèstre que s’espandís.

N’ i a que dison que las riquesas produitas foguèron dobladas las vint cinc darrièras annadas e que van encara doblar d’ara en 2050, de que apasturar las caissas amb una reparticion onèsta. Mas d’aquò n’avètz ausit parlar a la television o a la ràdio ?

Bonjorn a totes e totas,

2010-11-03T16:56:00.002+01:00

L’idèa me rabalava dins lo cap dempuèi un brieu… Un blòg…

Mas caliá trapar una ofèrta sens publicitat, d’un manejament aisit, s’es possible en occitan, patin patan e tot aquò.

Autre pensament, un blòg es gaireben un jornal. Aquò vòl dire qu’i cal escriure benlèu pas cada jorn, mas plan sovent. Ajusti : escriure un quicòm que siá interessant evidentament, sequenon… Un quicòm agradiu, de causas variadas, amb de fotòs, de videòs, de musica , un fum de daquòs, un vertadièr copa cap que.

Mas los problemas tecnics resolguts, sèm pas arribats çaquelà. Se las causas s’adoban plan, que lo blòg es un pauc interessant, lo mond van escriure. E qual s’entrevarà per respondre ? Avètz trobat ? Sètz plan intelligent…

En mai d’aquò, quand vesètz lo blòg (o puslèu l’òbra) de Mela, aquí lo ligam per los que coneisson pas : http://melanizetofre.blogspot.com/, e ben trapatz una mena de complèx …

Alavetz, fin finala lo fas o pas ? Ben, passat per tot, la demanda es faita d’un biais tant gent, amb de precaucions de pertot, de promessas d’ajuda e que te sabi ieu, qu’i anam passar…

Vos sètz marcats ? Veiretz de país !

… e al còp que ven !