Norbèrt Aspa

Amb l'aimabla autorizacion de Nadau, aquí lo tèxte pertocant sus Norbèrt Aspa de La Baderca (Herran).

Norbèrt Aspa, que s’aperava
Un shinhau innocent,
Ena Badèrca que s’estava,
País de brava gent.
Que’s perdec ‘ra comprenedèra,
Quan se perdèc ‘ra mair.
Sus eth monument dera guèrra,
Que i ei eth nom deth frair,

‘Ra balaguèra ei a buhar,
Dilhèu eth temps que va cambiar

Ath mes d’aost quaranta quate,
Pugèren alemans,
Cremèren tot, tot en vilatge,
Cercavan resistants.
Norbert, a casa que’u trobèren,
No’s volec escapar,
Ara tortura que’u passèren,
‘Nà forçà’u a parlar.

‘Ra balaguèra ei a buhar,
Dilhèu eth temps que va cambiar

Eths òmes n’èran cap mès òmes,
Aceth onze d’aost,
Eths òmes n’èran cap mès òmes,
N’èran cap mès que lops.
No’s pòt parlar en cançoneta
De tot çò que l’an hèt,
Un darrèr còp de baioneta
En còr que l’aucidec.

‘Ra balaguèra ei a buhar,
Dilhèu eth temps que va cambiar

Qu’ei eth ivèrn a Palomèra,
Non i a cap mès de flors,
Que’t vam pausar sus era pèira
Aqueth boquet de mots.
Norbèrt Aspa, que s’aperava
Un shinhau innocent,
Ena Badèrca que s’estava,
País de brava gent.

‘Ra balaguèra ei a buhar,
Brembatz-vos de Norbèrt Aspa

Michel Maffrand Abriu de 2017