De fil en veta...: d’abril 2024

dimecres, 10 d’abril del 2024

CHATGPT

Coma o sabèm, ChatGPT es un algoritme capable de donar de responsas espantantas en lengatge natural. Es un algoritme de l’arquitectura fòrça complèxa, rica de detzenats de miliards de paramètres que sas valors son afinadas dins un periòde d’entraïnament abracadabrantesc : ChatGPT es apasturat de quantitats gigantas de tèxtes e cerca de respondre estatisticament del melhor possible a una sola e unica question : una tièra de mots estant, se pòt tirar lo mot venent ?
Al cap d’aquela fasa d’entraïnament, ChatGPT pòt èsser utilizat per produsir de tèxtes en responsa a las nòstras questions. Al delà de l’autentica proesa, cal doncas servar en ment que la concepcion del discors que inspirèt la fabricacion de ChatGPT considera que tota novèla enonciacion ven d’una prediccion basada sus una molonada d’enonciacions passadas. ChatGPT es pas capable de crear un discors imprevist, un discors " disruptiu ", un discors singular, un discors liure. Plan segur lo podètz acostumar a escriure coma Hugo, Virginia Woolf o un poèta subrerealista, mas serà pas capable de produsir un discors qu’imita pas los motius textuals emplegats per l’entraïnar.
Per ChatGPT, tot çò que se poiriá dire, torna al ja dit, a una prediccion ! Los mots se poiràn bolegar, i pas res a far, solas lors combinasons pre-establidas comptaràn. Un pauc coma los eròis d’una tragedia que poiràn res far contra la fatalitat de lors destinadas que son pre-determinadas. Es per aquò qu’es perfèitament legitim d’afortir que ChatGPT es una tecnologia tragica.[...]
De còps, podèm préner plaser al vertige d’aquela mena de viatge immobil qu’es de desirar demorar embarrat dins un lengatge, un ambient o un estil determinat a l’avança e que res vendrà pas trebolar. L’escritura d’unas serias TV parteja amb ChatGPT aquela simbolica totalitària.[...]
S’avisar d’aquel element tragic pòt manténer nòstre optimisme : s’alegrar de poder viure, pensar e parlar, non pas coma ChatGPT, mas coma un èstre uman liure, çò que vòl res dire per un algoritme generatiu. Se regaudir de poder agachar lo lengatge coma una escasença de produsir d’inedit ! De jamai dit.
Enfin, avèm la possibilitat de jogar amb aquò. Jogar a parlar coma ChatGPT, e ne rire entre se e amb los autres. Amb, a la clau, la possibilitat de s’amusar a desseparar nòstra vida de nòstras performanças (aicí nòstres actes de discors), çò que a l’ora d’ara es plan vengut ! Mercé a aquel vira-vira, çò tragic se muda en comic o en tragi-comic.
Tirat e revirat de ChatGPT est une technologie tragique !, Lionel Naccache, France culture.