De fil en veta...

diumenge, 5 de maig del 2024

LAPINADA

Dins la dralha doberta pel doctor ATTAL, perqué pas inventar :
- una taxa colòbra per las victimas dels 50 milions de rendètz-vos anullats per manca de mètges ;
- una taxa pijon pels pacients que pagan ja de despassaments d’onoraris e, per subrepés, patisson de desremborsaments.
E perqué pas tanben una taxa piòt per poder polsar amb lo desmargament climatic ?
Mas tanben :
- una taxa camèl pels responsables dels desèrts medicals ;
- una taxa voltor pels especulators del sector mercand de la santat ;
- una taxa esponga pels patrons del CAC 40 e los accionaris que nos chucan liquide, moneda, dardenas, tuna, cash, black, etc. ;
- una taxa talpa pels deputats Renaissance que veson pas res, escotan pas res, ausisson pas res, comprenon pas res ;
- una taxa papagai per la molonada de jornalistas que meton la barra plan nauta dins la comunicacion macroniana ;
- una taxa camaleon per totes lo fachos qu’amagan lor jòc e pican a la pòrta del poder.
Segon un article del jornal sindical Le Trait d’Union des Retraités et Préretraités CGT FAPT de la Haute-Garonne.

divendres, 3 de maig del 2024

MANCA

dimecres, 1 de maig del 2024

UNA PRECAUCION INUTILA

Filippo èra un que se vantava de saber faire las maletas. E aquò èra vertat. Metiá totjorn dos fretadents dins la maleta.
- Òm sap jamai, disiá : poiriam aver un auvari ferroviari : un fretadents se copa, demòra l’autre.
Quina peguesa ! Dins un auvari, un venguèsse a se copar, probable que l’autre tanben. Se comprendriá se se botava una dotzena de fretadents dins la maleta. Alara, tan grèu que foguèsse l’auvari, i auriá totjorn l’esper de ne salvar almens un. Mas aquò tanben es una peguesa : se l’auvari se fa pas ? Que faire d’una dotzena de fretadents ?
- N’encontrèri un – diguèt Filippo, mentre qu’emplenava sa maleta – que viatgiava pas qu’amb almens trenta fretadents en prevision d’un auvari. E ben, un còp l’auvari se faguèt, e la precaucion foguèt plan inutila.
- Pas un dels fretadents de l’amic se salvèt ?
- Non pas, diguèt Filippo, se salvèt quitament pas una sola de las dents. Alara que, ironia completa, totes los fretadents foguèron salves.
Tirat e revirat de A. Campanile, escriveire italian, Se la luna mi porta fortuna.