BIG BROTHER PIZZA

-      Lèulèu-Pizza, bonser.

-      Bonser, es per una comanda sioplèt.

-      Òc, me podètz balhar vòstre NIN, Mossur ?

-      Mon Numèro d’Identificacion Nacional ?  Esperatz un pauc, aquí, es lo 6102049998-45-54610.

-      Me presenti, soi Ventremòl. Plan mercé Mossur Dacòs. Doncas, anam actualizar vòstre fiquièr : vòstra adreça es plan carrièra del trauc, vòstre numèro de telefòn professional dins la Societat Mascolhonat lo 05 01 02 03 04 e vòstre numèro personal lo 06 05 04 03 02. Es plan aquò Mossur Dacòs ?

-      Òc. 

-      Vesi que sonatz d’un autre numèro que correspond a l’ostal de Madomaisèla Tastafigas, qu’es vòstra secretària tecnica. Coma son 11 oras e mièja del ser e que sètz en RTT, vos podèm liurar a l’ostal de Madomaisèla Tastafigas pas que se mandatz un XMS de vòstre telefonet amb lo còdi AQ25JkPn.

-      Bon, o fau, mas d’ont tiratz aquelas entresenhas ?

-      Sèm conectats al sistèma crosat, Mossur Dacòs.

-      Cocanha! Bon, alavetz voldriái doas pizzas especialas mexicanas. 

-      Pensi pas que siá una bona idèa Mossur Dacòs.

-      De qué ?

-      Vòstre contracte d’assegurança malautiá a pas previst una causida tan dangierosa per vòstra santat, patissètz d’ipertension e d’un nivèl de colesteròl superior a las valors contractualas. D’un autre costat, Madomaisèla Tastafigas es estada tractada fa tres meses pels emorroïdas, lo pebròt es bravament desconselhat. Foguèsse mantenguda la comanda, la societat d’assegurança riscariá d’aplicar una subreprima.

-      Oi ! Quina proposicion me fasètz alara ?

-      Podètz ensajar nòstra pizza aleujada al iaort de sòja, soi segur que l’anatz presar…

-      Qué vos fa creire que m’agradarà aquela pizza ?

-      Avètz agachadas las « recèptas gormandas al sòja » a la bibliotèca de vòstre Comitat d’Entrepresa la setmana passada, Mossur Dacòs e Madomaisèla Tastafigas a fait, ièr passat, una recèrca sul Net en emplegar lo motor « bogre.de.con » amb los mots-claus « sòja » e « alimentacion ».

-      Bon, d’acòrdi. Ne’n vòli doas format familial.

-      Coma sètz ara per ara tractat amb Zipronax, que Madomaisèla Tastafigas pren de Biprovex (3 pastilhas per jorn) e que la pizza conten, segon la legislacion, 150 mg de Fenilseptina per 100g, avèm una risca de vomit en prene lo modèl familial. La legislacion nos enebit donc aquela liurason. Mas, vos pòdi liurar lo modèl mini.

-      Bon, va plan pel modèl mini. Vos dòni lo numèro de la carta de credit.

-      Me vesètz desconsolat Mossur. Crenti que foguèssetz obligat de pagar en moneda. Lo sòlde de vòstra carta Visa despassa lo limit e avètz daissada vòstra carta American Express al trabalh. Es çò qu’indica lo Credicard Satellit Tracer.

-      Vau anar cercar de moneda al tirador automatic abans l’arribada del pizzaiolo.

-      Aquò marcharà pas tanpauc, Mossur Dacòs, avètz trespassat lo limit de retrait setmanièr.

-      Mas aquò vos regarda pas ! Mainatz-vos per mandar las pizzas. Aurai la moneda. Quant de temps per aquò ?

-      Amb los delais ligats als contraròtles de qualitat, seràn al vòstre dins ¾ d’ora a quicòm pròche. Se sètz preissat, podètz ganhar 10 minutas en venir las quèrre, mas aquò’s malaisit en escotèr.

-      Mas cossí fasètz per saber qu’ai un escotèr ?

-      Vòstra veitura es al garatge Peugeot per reparacion, per contre vòstre escotèr a plan passat lo contraròtle tecnic e es parcat davant l’ostal de Madomaisèla Tastafigas. D’un autre costat vos vòli dire de far mèfi amb lo taus d’alcoolemia. Avètz reglat 4 aperitius al Tropical Bar fa mièja ora. Compte tengut de la composicion d’aquel aperitiu e de las caracteristicas vòstras, vos e Madomaisèla Tastafigas sètz pas a mand de menar. Riscariatz un retrait de permés sul pic.

- Macarèl de macarèl !

-      Vos aconselhi de demorar suau, Sénher Dacòs. Vos senhali que nòstre estandart ten un sistèma anti-escòrna en linha que s’activarà al segond còp. Vos afortissi que lo planh es automatizat. Vos rementi que sètz estat ja condemnat en julhet 2013 per manca de respècte a agent. Quicòm mai, sénher Dacòs ?

-      Nani, res. A òc, desbrembrètz pas lo Coca a gratis amb las pizzas coma o ditz la reclama.

-      Regrèti, sénher Dacòs, mas nòstre metòde qualitatiu nos enebís de prepausar de sodas a gràtis per las personas en subrepés. A títol de compensacion, vos pòdi daissar 15% de remesa sus una adesion flash al contracte Jurishelp, lo contracte de proteccion e d’ajuda juridica de Lèulèu Assegurença. Aquel contracte vos poiriá aparar per exemple pels fraisses del divòrci… vist que sètz maridat amb Dòna Clara Dacòs, nascuda Peldemil, dempuèi lo 15-II-2008 e vist vòstra preséncia tardiva en çò de Madomaisèla Tastafigas, e vist tanben la crompa fa una ora de temps a la farmacia del Canal d’una saqueta de 15 Goodlex e d’un botelhon de lubrificant per usatge intim. A títol de promocion, vos pòdi donar amb las pizzas una bilheta de reduccion de 5 euros per vòstras crompas venentas en preservatius valable en çò de LèulèuParafarm. Ça que la, ensajatz de defugir tota pratica susceptibla d’irritar las emorroïdas de Madomaisèla Tastafigas, per lasqualas LèulèuParafarm declina tota responsabilitat. Bonser, Sénher e mercé d’aver sonat Lèulèu-Pizza.
  

-      Recanalha, tant pièg me’n vau quèrre un crostet de pan e un salcissòt en çò de l’especièr de nuèit !