L'HAPPYCRATIE ou le pouvoir du bonheur en entreprise

2084. A sèt oras petantas, l’autoentreprenaire s’engulha las bralhas anti-ondas e sortís del dormitòri que partatja amb tres collaborators. O puslèu del coliving qu’a reservat lo mes d’abans amb son esmarfòn, doas estancis al dessús de son coworking. Sa vida se ten dins la maleta rodadissa e l’ordenator portable que quicha totjorn jol braç quand rabala segon los projèctes, aquí ont fan mestièr sas competéncias. Es encara d’ora mas l’open space es ja comol. Una collaboratritz li fa una pichona plaça sus son burèu. Alara li manda un “kiff” via son telefonet per la mercejar. A just lo temps d’adobar qualque linha de còde abans que lo chief happiness officer venga prepausar una sesilha de meditacion e comunion emocionala a l’entorn de la maquina a cafè. Puèi calrà trabalhar lèu, en se daissant pas qu’una micro-dormida dins la bofiga artificiala reservada de 14h15 fins a 14h35, dins un recanton de l’open space. Que, lo ser, i a una sesilha de mentoring, mena de tutorat ont se pòt desvolopar las competéncias en marketing. Es pas una qualificacion, solide, mas una linha de mai per ajustar a son perfil LinkedIn, doncas un element positiu per fin que los algoritmes de recèrca d’engenh s’arrestèsson sus son nom.