De fil en veta...

dijous, 6 de gener del 2022

AL ANDAR SE HACE CAMINO (MACHADO)

A la lutz dels aujòls caminam
Nos esclaira coma las ensenhas de la nuèit
Qu’acompanhan lo caminaire.
L’espandi m’es ostal
Ai lo cèl o las nívols per teulat
Volguèsses dintrar al mieu
Quand pas una pòrta se dobrís
Aquò’s que cap de batedís de pòrta
S’espandís entre tèrra e nivols.
Vau, cresi la tèrra mieuna
Los asuèlhs largs me son a posita
Quand dins un luòc me pausi
Sas gents venon mas gents
(Revirat de Al-Hutay’a, poèta arab, 600 - 679)

dimecres, 5 de gener del 2022

FANTASIÁ GASCONA

... en lengadocian.

CYRANO, Acte I, scèna 4
Cyrano : Viratz ! O digatz-me perqué me l’agachatz lo nas.
Lo desplasent : Mas...
Cyrano, anant cap a el : Qu’i trobatz que vos estona ?
Lo desplasent, de recuolons : Vòstre sénher s’engana...
Cyrano : Seriá mòl e penjant , sénher, coma una trompa ?...
Lo desplasent, de recuolons : Ai pas...
Cyrano : O crocut coma un bèc de cavèca ?
Lo desplasent : Non pas...
Cyrano : I vesètz una deca ?
Lo desplasent : Mas...
Cyrano : O una mosca, plan planet, s’i passeja ? Quicòm vos tafura ?
Lo desplasent : A !...
Cyrano : I vesètz una fauta ?
Lo desplasent : Mas d’i portar los uèlhs m’auriái degut reténer.
Cyrano : E perqué, vos disi, lo voldriatz pas veire ?
Lo desplasent : Aviái...
Cyrano : Vos fa fàstic ?
Lo desplasent : Sénher...
Cyrano : Malsana vos sembla la color ?
Lo desplasent : Sénher !
Cyrano : Gorrina la faiçon ?
Lo desplasent : Mas non !...
Cyrano : Perqué alara prene aquel èr desdenhós ? Benlèu l’estimatz un chic tròp prodigiós ?
Lo desplasent, quequejant : Per ieu es pichon, pichonet, pichoneton !
Cyrano : De qué ? m’acusar d’un tal biais ? Pichon mon nas ? Òu !
Lo desplasent : Ailàs !
Cyrano : Grandàs mon nas !
Aule camús, vergonhós, capleugièr, sapiatz
Que m’encresi d’aquel apondon
Qu’ un nas bèl es a de bon lo don
D’un òme gent, brave, cortés, de bon viure,
Aimable, onèste, coma soi e coma
Vos serà a jamai proïbit de vos creire
Miserabla gusalha !